Studiehandbok 2009/2010

Emnet skal gi kjennskap til sentrale spørsmål i dei humanistiske faga. Studiet inviterer til refleksjon omkring vitskaplege grunnlagsproblem og tar opp tilhøvet mellom dei humanistiske faga og samfunnet.

Generell studieomtale
Examen facultatum er eit obligatorisk innføringsemne i alle bachelorprogram i dei humanistiske faga (historie og språkfag) ved Høgskulen i Volda. Emnet kan også takast innanfor andre studium og bachelorprogram ved Høgskulen i Volda eller andre høgskular og universitet.

To tredelar av emnet svarar til ex.fac. ved andre høgskular og universitet, den siste tredelen er eit innføringskurs i vitskapleg oppgåveskriving.

Studiet er delt inn i eit kjerneemne (10 studiepoeng), som utgjer ex.fac.-delen, og eit særemne (5 studiepoeng), som er eit innføringskurs i vitskapleg oppgåveskriving.

Studiet legg vekt på nyare vitskapsteoretiske diskusjonar og den historiske samanhengen dei går inn i.

Ex.fac.-delen er delt i tre:

1. Humanistisk vitskapshistorie
2. Tekst og tolking (hermeneutikk)
3. Kunst og samfunn

1) Humanistisk vitskapshistorie
Emnet tar opp korleis ein kan forstå omgrepet vitskap. Ein diskuterer tilhøvet mellom humaniora og naturvitskap, historismen og den språklege vendinga i humaniora.

2) Tekst og tolking
Emnet tar opp hermeneutikkens historie. Ein diskuterer kva som ligg i omgrepet hermeneutisk metode, og fordjupar seg i den moderne debatten om hermeneutikk. Studenten vil også få ei kort innføring i moderne kulturforståing.

3) Kunst og samfunn
Emnet tar opp kunstomgrepet i eit historisk perspektiv med særskilt vekt på litteratur. Ein diskuterer synet på kunst i ulike periodar, og ser på tilhøvet mellom litteratur og røyndom. Viktige spørsmål er på kva måte kunst er knytt til historie, kultur og kjønn.

Særemnet (skrivekurset): På grunnlag av det stoffet som er gjennomgått i ex.fac.-delen, skal studenten få ei innføring i vitskapleg oppgåveskriving.

Undervisninga i ex.fac.-delen vert gjeven gjennom leksjonar på nettet. Studentane følgjer opp gjennom oppgåveskriving og responsar på medstudentar sine oppgåvetekstar. I arbeidet med den skriftlege oppgåva får studentane rettleiing frå faglærar.

For gjennomføring av skrivekurset er det lagt opp til seminarundervisning og arbeid i basisgrupper med studentinnlegg, respons og diskusjon. Det er obligatorisk frammøte.

Arbeidskrav i ex.fac.-delen:

1. Studenten skal skrive ei godkjenningsoppgåve (ca. 3 sider à 2000 teikn) frå kvart delemne. Oppgåva skal vere grunnlag for respons og diskusjon, og ho skal godkjennast av faglærar.
2. Studenten skal gi skriftleg respons på seks oppgåveutkast frå medstudentar i løpet av kurset (ca. 1/2 - 1 side for kvar respons).

Komplett arbeidsmappe (3 oppgåver og 6 responsar) skal vere godkjend i same semester som arbeidet er utført.

Arbeidskrav i skrivekurset:

1. Studenten skal levere eit utkast til oppgåve (1-2 sider à 2000 teikn) innanfor det første delemnet i ex.fac.-studiet.
2. Studenten skal gje respons på to oppgåveutkast frå medstudentar.
3. Med utgangspunkt i responsane skriv studenten eit nytt oppgåveutkast (ca. 3 sider). Dette utkastet kan vere identisk med oppgåva som studenten skal levere i første delemnet i ex.fac.-studiet.
4. Studentar som ikkje tek del i minst 80% av forelesningane, må gjennomføre ein 2 timars individuell prøve på Fronter.

Arbeidskrava skal godkjennast av faglærar og må vere godkjende for at studenten skal kunne gå opp til eksamen.
Arbeidskrava skal vere oppfylte i same semester som undervisninga blir gitt.

Ei av dei tre godkjenningsoppgåvene skal studenten etter eige val utvide til ei eksamensoppgåve (ca. 10 sider à 2000 teikn) som skal leverast innan ein fastsett frist.

Det vert gjeve bokstavkarakter. Skalaen går frå A-F, der E er siste ståkarakter.

Ex.fac.-delen
Krogh, Thomas m.fl.: Historie, forståelse og fortolkning. Oslo 1996.
Gregersen, Frans og Simo Køppe: Idehistorie. Ideer og strømninger i det 20. århundrede. Bd.1. København 1994, Del III, s. 141 - 239.

Faglæraren kan supplere eller byte ut einskilde kapittel med artiklar og anna aktuelt stoff.

Skrivekurset
Dysthe, Olga, Frøydis Hertzberg og Torlaug Løkensgard Hoel: Skrive for å lære. Oslo 2000.

Alternativ:
Lie, Sissel: Fri som foten. Om å skrive fagtekster. Oslo 1995.

Emnet vert evaluert i samsvar med HVO sitt kvalitetssikringssystem.