Musikk

Kvifor velje dette programmet?

Studiet gir deg ei grunnleggande innføring i musikkteoretiske emne, praktisk musisering og musikkpedagogikk for grunnskulen. Som musikkstudent får du ta del i eit aktivt og rikt musikkmiljø. Høgskulen i Volda har mellom anna eige kor, symfoniorkester, musikkstudio og gode øvingslokalitetar.

Kva lærer du?

Som student skal du få kunnskapar og ferdigheiter innan musikkfaglege emne med vekt på musikkteori, høyrelære, arrangering, musikkorientering og musikkutøving med instrumentalopplæring. Du skal utvikle pedagogisk og sosial kompetanse for å kunne utøve musikkfaget i undervisningssamanhengar med vekt på aktivitetar innan musisering, komponering og lytting. Gjennom praktisk erfaring i studentgruppa og i grunnskulen skal du utvikle fagleg innsikt og evne til didaktisk og yrkesetisk refleksjon.

Oppbygging og gjennomføring

Årsstudiet i musikk skal gi studentane eit fagleg grunnlag for å kunne utvikle seg innanfor musikkfagleg verksemd og eit didaktisk grunnlag for å kunne planleggje, organisere, gjennomføre og evaluere ulike læreprosessar og arbeidsmåtar i musikk for elevar i grunnskulen.

Studiet er sett saman av fire emne:

· Inn i musikken 1, 15 stp.

· Musikk i barneskulen, 15 stp.

· Inn i musikken 2, 15 stp.

· Musikk i ungdomsskulen, 15 stp.

Aktuelle yrke og vidare studium

Studiet rettar seg inn mot arbeid med musikk i grunnskulen. Det er identisk med første året i bachelorstudiet i musikk ved Høgskulen i Volda. Det kan inngå som valfri del i andre bachelorgradar eller i ein fagkrins med praktisk-pedagogisk utdanning (PPU). Studiet dannar også grunnlag for opptak til fordjupingsstudium i musikk.