Studieprogramnamn

Nynorsk skriftkultur

Engelsk studieprogramnamn

New Norwegian Written Culture

Studietype

Mastergradsstudium

Studiepoeng (ETCS)

120

Studielengd

4 (på heiltid) eller 8 (deltid)

Opptakskrav

Opptaksgrunnlaget til mastergradsstudiet i nynorsk skriftkultur er oppnådd bachelorgrad, cand.mag.-grad med fordjuping/mellomfagseksamen tilsvarande 90 studiepoeng i eitt av følgjande fag eller tilgrensande fagområde: etnologi, filosofi, historie, idéhistorie, kulturvern og kulturformidling, lingvistikk, litteraturvitskap, medievitskap, norsk/nordisk, pedagogikk, sosialantropologi, sosiologi, statsvitskap.

Søkjarar som har andre relevante fag eller utdanning på same nivå og av tilsvarande omfang, kan søkje om særskild vurdering.

Innleiing

Masterstudiet i nynorsk skriftkultur er eit kulturstudium. Studiet formidlar innsikt i skriftkulturen generelt, og i den nynorske skriftkulturen særskilt. Studentane får eit grundig, tverrfagleg og komparativt innsyn i kva skriftkultur er, og korleis skrift og kultur er knytte saman. Vi brukar ulike fagdisiplinar. Dei mest aktuelle er språkvitskap, historie, litteraturvitskap, mediekunnskap, sosiologi, antropologi, filosofi og pedagogikk.

Studiet gir deg brei språk- og kulturkompetanse og kvalifiserer deg for undervisning i skuleverket, for arbeid i fagstillingar ved museum, i offentleg og privat kultursektor, i kulturadministrasjon og ved kulturformidlingsinstitusjonar. Kulturinstitusjonar av typen Nynorsk kultursentrum, Det Norske Samlaget og NRK kan vere aktuelle arbeidsgivarar. Fullført mastergrad gir høve til å søkje om opptak ved doktorgradsprogram.

Læringsutbytte

Studiet gir deg kunnskap om historia og situasjonen til den nynorske skriftkulturen. Du vil vere i stand til å plassere denne skriftkulturen i høve til andre mindre brukte skriftspråk, og til språk- og identitetsbaserte minoritetskulturar andre stader i verda. Du vil vere stø i nynorsknorma, og kunne formidle ho vidare.

Fagleg oppbygging

Masterstudiet i nynorsk skriftkultur går normalt over to studieår på full tid, men det vert lagt til rette for studentar som vil ta studiet over lengre tid. Undervisninga er organisert i tre vekesamlingar pr. semester, i veke 36, 40 og 44 i haustsemesteret, og i veke 6, 10 og 13 i vårsemesteret. Studiet er lagt opp med tanke på at studentane skal kunne konsentrere seg om masteroppgåva. Det kan dei gjere anten ved Ivar Aasen-instituttet, eller ved ein av dei institusjonane vi samarbeider med i utlandet. Det gir klare fordelar å ta eit semester ved ein av desse institusjonane, men det er ikkje obligatorisk. Det ev. studieopphaldet i utlandet vil normalt vere i 3. semester for heiltidsstudentar, etter behov for deltidsstudentar.

Innføringsemna (obligatoriske):
A: Nynorsk skriftkultur

B: Vitskapsteori og metode

Valemna:
Vi tilbyr fem valemne. Kvar student skal velje to valemne, kvart på 15 studiepoeng. Det vil bli undervist i emnet Nynorsk skriftmål – om norm og bruk annakvart år. Dei andre valemna vil veksle frå år til år, slik at vi underviser i to av dei om gongen:

· Målreisingar og språkplanlegging i komparativt perspektiv

· Den nynorske teksten – om sjanger, institusjon og norm

· Talemålsendring og skriftspråksstandardisering

· Nynorsk skriftmål – om norm og bruk

· Nynorsk filosofisk skriftkultur

Masteroppgåva:
Studentane står heilt fritt til å velje emne, men vi er innstilte på å formidle vidare ynskje om forsking frå andre institusjonar, t.d. i det offentlege eller i målrørsla, og vi er særleg glade for prosjekt som knyter seg opp til aktuelle forskingsprosjekt ved og omkring instituttet.

Vurdering:
Sekstimars skriftleg eksamen i dei to innføringsemna, emneoppgåve i valemna. Masteroppgåva vert vurdert med særskild karakter som kan justerast etter obligatorisk prøveførelesing og munnleg eksamen.

HEILTID

DELTID

Evaluering og kvalitetssikring

Studieprogrammet vert evaluert i samsvar med HVO sitt kvalitetssikringssystem.

Studieprogramansvarleg

Stephen J. Walton, tlf. 70 07 52 17, e-post stephen.walton@hivolda.no

Studieprogramkode

NYNMG

Avdeling

Ivar Aasen-instituttet