Rus - samfunnsproblem, førebygging og behandling

Karrierevegar

Studiet kan nyttast som 30 valfrie studiepoeng i Master i helse- og sosialfag og Master i samfunnsplanlegging og leiing ved HVO, og ein kan søkje om innpassing i mastergradsstudium ved andre høgskular og universitet.

Innhald og arbeidsmåtar

Frå 1990-talet har alkoholbruken i det norske folket auka for kvart år. Måten nordmenn bruker alkohol på, er også i endring. Mellom anna drikk nordmenn oftare enn før og meir pr. drikketilfelle. Forskarar melder om at nordmenns haldningar til alkoholbruk har vorte meir liberale, og at det er akseptert og vanleg å bruke alkohol i fleire samanhengar enn tidlegare. Desse endringane kan føre til at fleire får problem som følgje av alkoholbruken sin.

Bruken av ulike narkotiske stoff er også eit vedvarande problem i det norske samfunnet. Dei siste åra har særleg ungdommars bruk av cannabis vore i fokus blant forskarar og behandlarar, fordi nyare forsking tyder på at dette fører til større helseskadar enn ein har trudd tidlegare. Hjelpetiltaka for folk med rusproblem er inne i ein omstillingsfase. Helsetilboda til denne gruppa vert styrkt, og ansvars- og arbeidsfordelinga på hjelparsida vert omorganisert. Dette stiller dei som arbeider i rusomsorga, overfor nye og store utfordringar. Studiet er meint som eit svar på denne utfordringa.

Sentrale tema:

· Rusbruk i eit historisk perspektiv

· Rusbruk i eit helse- og sosialpolitisk perspektiv

· Rusbruk i eit kjønnsperspektiv

· Alternative perspektiv på rus og avhengigheit

· Ungdom og rus

· Born i familiar med rusproblem

· Rus og arbeidsliv

· Rus og sjølvmord

· Etikk og menneskesyn i arbeidet med rusrelaterte problem

· Forståingsmodellar – det ideologiske og teoretiske grunnlaget for behandling

· Aktuelle behandlingsmåtar for personar som har rusproblem, og kva slags vurderingar som må liggje til grunn for val av metode

· Organisasjonsstrukturen på rusmiddelfeltet

Slik er studiet lagt opp

Studiet gir deltakarane høve til å reflektere over og møte rusproblem på ein løysingsorientert måte på arbeidsplassen, i familien og andre stader. I løpet av studiet vil studentane få eit breitt nettverk av kollegaer som arbeider med rus- og avhengigheitsproblematikk innanfor helse- og sosialtenestene og på andre felt av samfunnslivet der ein møter rusproblem.

Studiet er delt i to emne: Rus som kulturelt og sosialt fenomen og Tiltak mot rusproblem.

Læringsformer:
- Førelesingar, ekskursjon, gruppearbeid, sjølvstudium og oppgåveskriving mellom samlingane med rettleiing av erfarne lærarar.