Media, IKT og design

Karrierevegar

Gjennom emneval i andre og tredje studieåret vil studenten kunne kvalifisere seg for arbeid i mediebransjen, vidaregåande skule eller fagfelt som gir grunnlag for opptak til relevante mastergradsutdanningar. For undervisning i skuleverket er det krav om eit års praktisk-pedagogisk utdanning etter bachelorgraden. Studiet gir ingen formell kompetanse i grafisk design, men vil styrkje realkompetansen på dette fagfeltet.

Praksis

I vårsemesteret tredje året får studentane tilbod om ekstern praksis i form av praksisopphald eller produksjonar for eksterne oppdragsgivarar avhengig av val av studieretning.

Internasjonalisering

Du kan reise utanlands som del av studiet om hausten i 3. studieåret. MID har avtalar med universitet og høgskular både i Norden og USA, Australia, Canada, Irland, Storbritannia, Spania, Tyrkia og ei lang rekkje andre land.

Les meir: www.hivolda.no/ut

Kort om programmet

Utdanninga er eit treårig studieløp med fordjuping i digitale medium med vekt på både teoretisk og praktisk tilnærming til design og produksjon for og kommunikasjon med ulike målgrupper. Studiet har tre ulike retningar: mediekommunikasjon, medieproduksjon og mediedesign. Ut frå spesialisering vert studenten kvalifisert til medie- og informasjonsteknisk arbeid i næringsliv, skule eller vidare studium på mastergradsnivå.

Dette lærer du

I studiet lærer du både om korleis media fungerer som samfunnsaktør og formidlar, og korleis du kan kommunisere med ulike målgrupper. Gjennom teori, praksis og produksjonar med ulike medieuttrykk som foto, film, reklame, illustrasjon, lyd, animasjon, web og multimedia gir studiet også pedagogisk, estetisk og teknisk kompetanse innanfor digital medieproduksjon.

Slik er studiet lagt opp

Utdanninga er sett saman av praktiske og teoretiske emne som er knytte til mediekommunikasjon, medieproduksjon og mediedesign. Som del av studiet inngår både praksisopphald, større prosjektarbeid og produksjonar for ulike oppdragsgivarar.

Det første året tek for seg grunnleggjande emne innanfor mediekommunikasjon, mediekultur og mediekompetanse. Ein kombinerer teoretisk innsikt i vitskapsteori og analyse med praksisopphald og praktisk arbeid i medieproduksjon innanfor foto, film, mediedesign, web, lyd og avis, slik at studenten får både praktiske ferdigheiter i bruk av ulike medium og innsikt i korleis dei kan brukast i ein formidlingssituasjon anten gjennom media eller i direkte møte med ulike målgrupper.

Det andre året legg vekt på å vidareutvikle kunnskap om etiske, estetiske og tekniske sider ved bruk og kombinasjon av digitale medium med utgangspunkt i fleirkamera- og multimedieproduksjon. Studentane vel her retning på studiet, mellom tilbod i visuell kommunikasjon og mediedesign, foto og illustrasjon, vevdesign og programmering, mediekommunikasjon og analyse. Ein vil også kunne velje inn andre medierelaterte emne.

I det tredje året skal studentane spesialisere seg vidare innanfor eitt av fagfelta mediekommunikasjon, medieproduksjon og mediedesign. Utanlandsstudium inngår også som eit val hausten tredje året. Undervisninga vekslar mellom førelesingar i storgrupper, sjølvstudium, prosjektarbeid, produksjonar og problemorienterte og studentaktive undervisningsformer. I tillegg kjem fleire skriftlege og praktiske oppgåver, praktiske kurs og praksis i ulike institusjonar.