Animasjon
Animasjonsutdanninga i Volda starta opp i 1992 og har inntil nyleg vore den einaste i sitt slag i Noreg. Studiet er retta mot kreative personar med interesse for visuelle medium. Studentar og fagfolk i animasjonsmiljøet i Volda er kjende langt utanfor landegrensene og haustar årleg prisar i internasjonale filmfestivalar. Mange av dei store norske animasjonssuksessane både i film- og spelbransjen er skapte av ressurspersonar med bakgrunn frå Volda
Karrierevegar
Den norske animasjonsbransjen er liten når ein samanliknar med andre mediemiljø i Noreg, og bransjen rekrutterer medarbeidarar med ulik bakgrunn. Men bransjen er i sterk vekst. Animatørar arbeider med eit vidt spekter av teknikkar i ulike sjangrar. Animerte TV-seriar og animerte langfilmar for kinodistribusjon er viktige arbeidsområde for animatørar. Bruk av grafiske effektar og animasjon i fjernsyn er i dag vanleg, og i tillegg treng digitale medium (CD-rom, internett, dataspel m.m.) animatørar. Bachelorgradsstudiet i animasjon kvalifiserer for opptak til relevante mastergradsstudium i Noreg og i utlandet.
Praksis
Studentane blir oppfordra til å arbeide delar av fjerde eller femte semester i eit profesjonelt animasjonsstudio.
Internasjonalisering
Det blir lagt til rette for at studentar kan gjennomføre delar av studiet i utlandet ved utdanningsinstitusjonar vi samarbeider med, til dømes i Danmark, Storbritannia, Estland, Kina, Tyrkia, Kroatia og Frankrike.
Kort om programmet
Studiet i animasjon er eit praktisk-teoretisk studium der teorien byggjer opp om det praktiske arbeidet. Teorien omfattar innføring i ulike medievitskaplege og animasjonsteoretiske emne, og design- og produksjonsteori. Innhaldet i dei praktiske emna er mellom anna innføring i teiknefilm, tradisjonell cutout, stop-motion (dokkefilm), grafisk design, bruk av Adobe Flash, digital cutout/motion design ved hjelp av program som After Effects, og bruk av Photoshop og 3D-software som Maya.
Dette lærer du
Studiet kvalifiserer for profesjonelt arbeid med animasjon som sjølvstendig uttrykk (t.d. animert kortfilm), og bruk av animerte teknikkar i nyhende, informasjon, reklame og underhaldning.
Slik er studiet lagt opp
Animasjonsstudiet er eit integrert treårig praktisk-teoretisk studium med få valfrie emne. Arbeidsformene i studiet er ein kombinasjon av førelesingar, gruppearbeid og praktiske øvingar. Dei praktiske øvingane og undervisninga knytt til dei, er obligatorisk. Teoriundervisninga foregår i hovudsak som gruppeførelesingar. Studentproduksjonar utgjer ein stor del av det praktiske arbeidet, og det er i hovudsak her den praktiske læringa skjer. I samband med dei praktiske oppgåvene blir det lagt vekt på individuell rettleiing og oppfølging i alle ledd i produksjonen. All praktisk undervisning er obligatorisk dersom studentane ikkje kan dokumentere tilsvarande kunnskap.
Generell studiekompetanse.
I tillegg blir det kravd arbeidsprøver der søkjarane må dokumentere evne i mellom anna frihandsteikning. Høgskulen vil orientere søkjarane om krava til arbeidsprøver i eige brev. Arbeidsprøvene blir vurderte av ein eigen fagkomité. Komiteen vil kalle inn aktuelle søkjarar til intervju i Volda, med supplerande oppgåver for godkjenning. Godkjende søkjarar konkurrerer på grunnlag av konkurransepoeng. Det blir teke opp inntil 10 studentar kvart år.
Andres Mänd, tlf. 70 07 50 72, andresma@hivolda.no
