Helse- og sosialfag – meistring og myndiggjering
Studiet siktar mot å styrkje helse- og sosialarbeidarane sin kompetanse i relasjonsarbeid retta mot einskildpersonar, familiar og grupper. Det vert fokusert på meistring og myndiggjering av menneske i alle delar av livsløpet når det gjeld å handtere utfordringar i ulike situasjonar.
Karrierevegar
Mastergradsstudiet gir eit godt grunnlag for klinisk arbeid, undervisning og førebyggjande arbeid. Særleg vil helseføretaka si satsing på læring og meistring gi utfordrande arbeidsoppgåver for mastergradskandidatane. Fullført mastergradsstudium gir grunnlag for å arbeide med FOU, og kan også kvalifisere for opptak til doktorgradsstudium.
Internasjonalisering
Ein vil arbeide for å få etablert samarbeid med utdanningsinstitusjonar i andre land, og at studentane skal få godkjent relevante emne gjennomført ved universitet eller høgskular i utlandet.
Kort om programmet
Gjennom studiet utviklar du kompetanse i kommunikasjon og informasjonsarbeid som kan leggje grunnlaget for læring, meistring og myndiggjering (empowerment). Studiet vil òg gi grunnlag for å leie og utvikle helse- og sosialtenester med slik profil. Høgskulen i Volda er ansvarleg for studiet, men samarbeider med Høgskolen i Ålesund (HiÅ) om dei valfrie emna.
Dette lærer du
Studiet skal gi deg kompetanse i og kunnskap om:
- Korleis sosial- og helsearbeidarar kan medverke til læring og meistring
- Kva pasientar/klientar kan meistre av oppgåver og ansvar i ulike tilstandar og ulike livsfasar
- Korleis meistring kan oppnåast
- Det etiske grunnlaget for relasjonen mellom helse-/sosialarbeidar og pasient/klient
- Korleis språk, informasjon og kommunikasjon kan påverke identitetar og relasjonar
- Viktige samanhengar mellom sosiokulturelle forhold, livsstil og helse- og sosialproblem, og korleis slik innsikt kan utnyttast i førebyggjande arbeid
- Det politiske og forvaltningsmessige grunnlaget for medverknad i sosial- og helsesektoren
- Forsking og utviklingsarbeid (FOU)
Slik er studiet lagt opp
Studiet er på 120 studiepoeng (stp), 75 av desse er obligatoriske, og 45 er valfrie. Du kan her velje blant godkjende emne ved Høgskulen i Volda og Høgskolen i Ålesund, ev. andre etter søknad. Studiet kan gjennomførast på heiltid over to år, eller på deltid, helst over fire år.
Obligatoriske emne:
- Meistring og myndiggjering – samhandlingsperspektivet (15 stp.). Hausten 2009
- Meistring og myndiggjering – strukturperspektivet (15 stp.). Våren 2010.
- Forskingsmetode og vitskapsteori (15 stp.). Går over to semester: hausten 2009 og våren 2010
- Masteroppgåve (30 eller 45 stp.). Går over to semester: hausten 2009 og våren 2010
Valfrie emne:
- Intensivmedisin (15 stp. HiÅ)
- Sjukepleie for kritisk sjuke (30 stp. HiÅ)
- Livsløp, velferd og planlegging (15 stp.). Våren 2010
- Rus som kulturelt og sosialt fenomen (15 stp.). Hausten 2009
- Tiltak mot rusproblem (15 stp.). Våren 2010
Det generelle kravet for å bli teken opp er minimum treårig grunnutdanning i helsefagleg, pedagogisk eller sosialfagleg utdanning.
• Bachelorgrad i helse- eller sosialfag
• Allmennlærar med relevante fagval
• Cand.mag. med relevant fagsamansetjing
• Annan relevant grad eller utdanningsløp av minimum 3 års omfang etter vurdering
For dei to siste punkta er det krav om fordjuping i fag, emne eller emnegruppe av minimum 80 studiepoengs omfang innan helse- eller sosialfag.
Nils Magne Magerøy, tlf. 70 07 51 63, nmm@hivolda.no
Kåre Heggen, tlf. 70 07 52 16, khe@hivolda.no
