Studiehandbok 2006/2007

Målet med informasjonsutdanninga er å

• kvalifisere til informasjonsarbeid i offentleg sektor, friviljuge organisasjonar og private bedrifter.
• gi studentane analytiske reiskapar som gjer dei i stand til å tolke og forstå informasjonsfaglege problemstillingar, og kunne kople teori med praktisk arbeid.
• gjere studentane i stand til å definere problem og målsetjingar, vurdere ulike verkemiddel og analysere konkrete informasjonstiltak.
• gi studentane eit medvite forhold til tale-, bilde- og skriftspråk.
• gi øving i ulike former for praktisk informasjonsarbeid.

Bachelorgraden i informasjon ved Høgskulen i Volda gir i alt 180 studiepoeng og er sett saman slik:
Informasjonsemne: 90 studiepoeng
Medievitskap: 45 studiepoeng
Journalistikk: 15 studiepoeng
Valfrie emne: 30 studiepoeng

Sjå emnetabell som viser normal framdrift i utdanninga.

Dei valfrie emna vert valde i samråd med studierettleiar eller faglærar i samband med oppsett av utdanningsplan. Programansvarleg skal minne studentane om retten til utdanningssamtale gjennom informasjonssystemet ClassFronter. Studentar med tidlegare fullført(e) studium i emne/fag frå andre høgskular/universitet i Noreg eller utlandet, kan søkje om å få dette godkjent som valfri(e) del(ar) av bachelorgraden.

Det er høve til å gjennomføre emna INF211 og INF212 i same semester. Dette kan frigjere eit semester til utdanning på ein annan institusjon, i Noreg eller i utlandet.

Det er i studiet lagt opp til stor variasjon i evalueringsformer, skuleeksamen, heimeeksamen, oppgåveskriving, munnleg høyring og bacheloroppgåve.

Informasjonsstudiet kvalifiserer for informasjonsfagleg arbeid i offentleg forvaltning, friviljuge organisasjonar og private bedrifter. Det skal gi kompetanse i å planleggje og gjennomføre informasjonstiltak og å gjere overordna strategiske analysar. Informasjonsmedarbeidarar har i dag ofte ein rådgivande funksjon knytt til leiinga i ulike organisasjonar og føretak, og studiet legg difor vekt på at studentane må kunne analysere kritisk kva som er kommunikasjonsproblem, og kva ein organisasjon må løyse på andre måtar. Slike analysar skal gi grunnlag for å kunne setje ut i livet informasjons- og kommunikasjonstiltak retta mot samfunnet rundt og i eigen organisasjon. Gjennom dei valfrie delane av studiet gir også utdanninga høve til spesialisering innanfor ulike fagområde.

Studieprogrammet blir evaluert i samsvar med Høgskulen i Volda sitt system for kvalitetssikring.