Digital kompetanse i læring

Om programmet

Årsstudiet er retta mot lærarar i grunnskulen og den vidaregåande skulen, og studentar i lærarutdanninga. Det primære føremålet med studiet er å setje lærarane og skulen i stand til å nå kompetansemåla i planverket med støtte i kreativ og målretta bruk av digitale verktøy og arbeidsmåtar. Studiet gir deg kompetanse for tilrettelegging for digitale arbeidsmåtar og bruk av IKT-verktøy i skulekvardagen.

Du lærer digital behandling av tekst, tal, lyd og bilete, og du lærer å identifisere situasjonar der bruk av digitale verktøy vil gi meirverdi i eige arbeid og i læringsarbeid. Studiet set bruk av digitale verktøy og arbeidsmåtar inn i eit skuleutviklingsperspektiv. Det vert lagt stor vekt på at arbeidet du gjer som student skal vere konkret og direkte relevant i eigen praksis.

Oppbygging og gjennomføring

Du vil gjennom aktive og utforskande arbeidsmåtar verte utfordra til å setje ord på korleis og i kva grad teknologi kan gi nye rammevilkår for læring, samstundes som du får høve til å ta regien i spennande og målretta medieproduksjonar, som nettavis, nettradio og video.

Studiet vert fleksibelt organisert med undervisningssamlingar og nettstøtte.

I studieplanen finn du detaljert informasjon om organisering, gjennomføring og eksamen.

Aktuelle yrke og vidare studium

Studieprogrammet gir deg framtidsretta digital kompetanse, som er etterspurd i skuleverket og i andre yrkessamanhengar der ein driv med formidling og kommunikasjon. Årsstudiet kan også inngå i valfri del av ulike bachelorgradar.