Kunst og handverk

Om programmet

Bachelor i kunst og handverk er utdanninga for deg som vil utøve og formidle kunst og kultur i skulen eller kultursektoren. I studiet vil du få innsikt og kompetanse i teknikkar innanfor varierte materialområde i arbeid med ulike visuelle uttrykkssjangrar. Studiet er i hovudsak praktisk, der oppgåveløysing knytt til fagteori er sentralt.

Du lærer å nytte kunst- og formkultur som grunnlag for å oppleve og forstå ulike kulturar og andre tiders uttrykksformer som inspirasjon og utgangspunkt for eige skapande arbeid. Det skal gi deg ei forståing for fagfeltet sin eigenverdi i eit historisk, samfunnsmessig, kulturelt, didaktisk og utviklingsmessig perspektiv. Du skal gjennom året utforme utstillingar og presentasjonar av eige arbeid, kunst- og kulturstoff eller prosjekt. I tillegg til teoretisk og didaktisk refleksjon får du utvikle di eiga kreative form- og uttrykksevne i varierte materialar og teknikkar.

Oppbygging og gjennomføring

For å oppnå bachelorgraden må studenten ha til saman 180 studiepoeng. Kunst og handverk utgjer minst 90 og inntil 120 av desse poenga, og dei resterande studiepoenga er knytte til val av andre fag.

I første studieåret er det opplæring i grunnleggjande praktisk og teoretisk kunnskap innanfor dei ulike materialområda i kunst og handverk. Andre studieåret er det ved sida av foto og Photoshop dei nye tekniske uttrykksformene som skal utforskast. I det tredje året er det tid for ei større oppgåve i kunst, kultur og kommunikasjon, der studenten sjølv vel materialområde og tema.

Døme på tilrådde studieløp:
1) Bachelor i kunst og handverk med mediekunnskap, minimum 60 studiepoeng mediekunnskap i valfri del. Dette løpet er skuleretta.
2) Bachelor i kunst og handverk med musikk og/eller drama/teater, minimum 60 studiepoeng i musikk eller drama/teater i valfri del. Dette løpet er skuleretta.
3) Bachelor i kunst og handverk med vekt på den kunstnarlege prosessen.
I dette løpet er det studentens eigenutviking som vert fokusert.

Aktuelle yrke og vidare studium

Studieprogrammet kvalifiserer for undervisning i grunn- og vidaregåande skule, kulturskulen, formidlingsarbeid i museum/galleri, kulturarbeid i kommunar m.m. I tillegg kan du velje eit løp der du fokuserer på eigne kunstnarlege prosessar.

Bachelor i kunst og handverk vil også danne grunnlag for opptak til mastergradsstudium i kunst og handverk.

Eit semester i utlandet

Det blir lagt til rette for at studentar kan gjennomføre delar av bachelorgraden ved utdanningsinstitusjonar i utlandet som Høgskulen i Volda har samarbeidsavtalar med, mellom anna University of Glamorgan i Wales eller University of Norwich i England.