Studieprogramnamn

PR, kommunikasjon og media

Engelsk studieprogramnamn

Public Relations, Communication and Media

Studietype

Bachelorgradsstudium

Studiepoeng (ETCS)

180 studiepoeng

Studielengd

6

Opptakskrav

Generell studiekompetanse

Innleiing

Bachelorprogrammet i PR, kommunikasjon og media skal utdanne sjølvstendige, leiande, kreative og kritiske kommunikasjonsstrategar.

Studiet kvalifiserer for kommunikasjonsfagleg arbeid i offentleg forvaltning, friviljuge organisasjonar og private bedrifter. Det skal gi kompetanse i å planleggje og gjennomføre informasjonstiltak og å gjere overordna strategiske analysar.

Avdeling for mediefag i Volda er det sentrale utdanningsmiljøet i Norge innan media og kommunikasjon. Her har det vore tilbod om kommunikasjonsutdanning sidan 1980-talet i tett samspel med journalistikk- og animasjonsutdanningane.

Læringsutbytte

KUNNSKAP
Kandidaten
  - har brei kunnskap om grunnleggande tema, metodar, teoriar, problemstillingar og verktøy innan kommunikasjonsfaget.
 - er oppdatert på sentrale forskingsspørsmål innan PR, journalistikk og medievitskap.

- kan oppdatere sin kunnskap innan det kommunikasjonsfaglege fagområdet.

- har kunnskap om kommunikasjonsfagets historie, tradisjonar, eigenart og plass i samfunnet.

- har kunnskap om ulike medium, deira rolle og funksjonar, og om aktuelle digitale endringsprosessar på mediefeltet.

- har kunnskap om tale-, bilde- og skriftspråket som sosialt fenomen og kommunikasjonsmiddel.

FERDIGHEITER
 Kandidaten
  - kan bruke relevant fagkunnskap, metodar og resultat frå forskings- og utviklingsarbeid på praktiske og teoretiske problemstillingar og treffe grunngjevne val.

- kan reflektere over eigen fagleg praksis og justere denne under rettleiing.

- kan finne, vurdere, og vise til informasjon og fagstoff og framstille dette slik at det kastar lys over kommunikasjonsfaglege problemstillingar.

- kan beherske relevante kommunikasjonsfaglege og journalistiske verktøy, teknikkar, sjangrar og uttrykksformer.

- kan samarbeide om kommunikasjonsfaglege prosjekt og ha kollektivt ansvar

- kan arbeide sjølvstendig og leie kommunikasjonsarbeid.

GENERELL KOMPETANSE
Kandidaten
  - har innsikt i relevante fag- og yrkesetiske problemstillingar

- kan planlegge og gjennomføre varierte arbeidsoppgåver og prosjekt som strekker seg over tid, åleine og som deltakar i gruppe, i tråd med etiske krav og retningslinjer.

- kan formidle sentralt fagstoff som teoriar, problemstillingar og løysingar både skriftleg og munnleg.

- kan utveksle synspunkt og erfaringar med andre med bakgrunn innanfor fagområdet og gjennom dette bidra til utvikling av god praksis

- kjenner til nytenking og innovasjonsprosessar.

- kan utøve kritisk og sjølvstendig tenking og presentere eit velformulert resonnement.

Fagleg oppbygging

Bachelorstudiet er oppbygd slik:

• PR- og kommunikasjonsemne: 90 studiepoeng
• Medievitskap: 45 studiepoeng
• Journalistikk: 15 studiepoeng
• Valfrie emne: 30 studiepoeng

I den valfrie delen av studiet har studentane stor fridom til å fordjupe seg i eit sjølvvald fagområde. Her kan ein anten velje medierelaterte emne, t.d. foto eller design, eller ein kan velje fordjuping på andre fagområde, t.d. samfunnsfag, økonomi eller språk. Dei valfrie emna vert valde i samråd med studierettleiar eller faglærar i samband med oppsett av utdanningsplan.

Det er lagt til rette for å gjennomføre tredje semester på ein annan institusjon i Noreg eller utlandet. Studentar med tidlegare fullførte studium i emne/fag frå andre høgskular/universitet i Noreg eller utlandet, kan søkje om å få desse godkjende og innpassa som valfri del av bachelorgraden.

Det er i studiet lagt opp til stor variasjon i undervisnings- og evalueringsformer. Undervisninga foregår både som forelesingar i store grupper, i mindre seminargrupper og som prosjektarbeid. Praktiske øvingar, både individuelt og i grupper, er også ein viktig del i mange av delemna. Evalueringsformene er varierte, og omfattar m.a. skuleeksamen, heimeeksamen, munnleg høyring og større sjølvvalde oppgåver.

Praksis

PR-studiet legg stor vekt på samanhengen mellom teori og praksis. Heilt frå første semester gjennomfører studentane ulike praktiske øvingar og prosjekt. Det første året er det lagt opp til interne oppgåver, seinare kan det vere aktuelt med litt større prosjekt i samarbeid med interessegrupper, organisasjonar og næringsliv i regionen.

Siste semester inneheld åtte veker ekstern praksis i ei kommunikasjonsavdeling. Dette kan vere i offentleg forvaltning, i ein organisasjon, i ei bedrift eller i eit PR-byrå. Gjennom denne praksisen siste året får studentane eit unikt innblikk i profesjonen og høve til å knyte verdfulle kontaktar med tanke på vidare karriere.

Anna som vedkjem gjennomføringa av studiet

I deler av studiet er det krav om obligatorisk frammøte.

Det blir gitt tilbod om å delta på ein eller fleire studieturar i løpet av utdanninga.

Evaluering og kvalitetssikring

Studieprogrammet vert evaluert i samsvar med HVO sitt kvalitetssikringssystem

Studieprogramansvarleg

Jens Standal Groven, 70 07 51 66

Studieprogramkode

INFBV

Avdeling

AMF