Media, IKT og design

Om programmet

Er du interessert i å studere aktuelle fenomen som Facebook, YouTube eller Google? Kunne du tenkje deg å arbeide med formidlingsmessige, tekniske og estetiske sider ved bruk av web, reklame, foto, film, lyd eller multimedia? Bachelor i media, IKT og design (MID) kvalifiserer deg til variert arbeid i mediebransjen eller kan utifrå val av studieretning gi undervisningskompetanse i den vidaregåande skulen.

Programmet har ei unik fagleg samansetjing av både mediekommunikasjon, medieproduksjon og mediedesign. Det har ei fordjuping i digitale medium med vekt på både teoretisk og praktisk tilnærming til design og produksjon. I studiet lærer du både om korleis media fungerer som samfunnsaktør og formidlar, og korleis du kan kommunisere med ulike målgrupper. Gjennom teori om og produksjonar av ulike medieuttrykk skal du få pedagogisk, estetisk og teknisk kompetanse innanfor digital medieproduksjon.

Oppbygging og gjennomføring

Utdanninga er sett saman av praktiske og teoretiske emne som er knytte til mediekommunikasjon, medieproduksjon og mediedesign. Som del av studiet inngår både praksisopphald, større prosjektarbeid og produksjonar for ulike oppdragsgivarar.

Det første året tek for seg grunnleggjande emne innanfor mediekommunikasjon, mediekultur og mediekompetanse. Ein kombinerer teoretisk innsikt i vitskapsteori og analyse med praksisopphald og praktisk arbeid i medieproduksjon innanfor foto, film, mediedesign, web, lyd og avis, slik at du får både praktiske ferdigheiter i bruk av ulike medium og innsikt i korleis dei kan brukast i ein formidlingssituasjon.

I det andre året vert det lagt vekt på å vidareutvikle kunnskap om etiske, estetiske og tekniske sider ved bruk og kombinasjon av digitale medium med utgangspunkt i fleirkamera- og multimedieproduksjon. Du kan velje mellom visuell kommunikasjon og mediedesign, foto og illustrasjon, vevdesign og programmering, mediekommunikasjon og analyse.

I det tredje året skal du spesialisere deg vidare innanfor eitt av fagfelta: mediekommunikasjon, medieproduksjon og mediedesign. Utanlandsstudium inngår også som eit val hausten tredje året.

Undervisninga vekslar mellom førelesingar i storgrupper, sjølvstudium, prosjektarbeid, produksjonar og problemorienterte og studentaktive undervisningsformer. I tillegg kjem fleire skriftlege og praktiske oppgåver, praktiske kurs og praksis i ulike institusjonar.

I vårsemesteret tredje året får du tilbod om ekstern praksis i form av praksisopphald eller produksjonar for eksterne oppdragsgivarar avhengig av kva studieretning du har valt.

Aktuelle yrke og vidare studium

Ut frå spesialisering vert du kvalifisert til medie- og informasjonsteknisk arbeid i næringsliv, skule eller til vidare mastergradsstudium. Studiet gir ingen formell kompetanse i grafisk design, men vil styrkje realkompetansen på dette fagfeltet.

Eit semester i utlandet

Studentar kan reise utanlands som del av studiet om våren i andre studieåret. Høgskulen i Volda har avtalar med universitet og høgskular i Norden, USA, Australia, Canada, Irland, Storbritannia, Spania, Tyrkia og ei lang rekkje andre land.